Не пакідайце ж мовы нашай беларускай...
Францішак Багушэвіч

У свеце шмат цудоўных моў. Адны з іх вабяць сваёй прыгажосцю і непаўторнасцю, другія — мілагучнасцю. Але ў кожнага чалавека ёсць толькі адна мова, якая завецца роднай. Менавіта на гэтай мове ён размаўляе з роднымі, сябрамі, знаёмымі. I вельмі дрэнна, калі чалавек пачынае забывацца на сваю мову, не беражэ яе. Вельмі важна шанаваць і вывучаць мову свайго народа.

Магчымасць паглыбіць уласныя веды і павысіць моўны ўзровень з’явілася ў вучняў 2 «Д» класа сярэдняй школы № 35 у ходзе мерапрыемства «Рускай мове дай разгрузку — размаўляй па-беларуску». Гульня праходзіла ў чатыры этапы, удзельнічалі тры каманды «Вясёлка», «Валошкі», «Млын».

Невычэрпны моўны скарб — прыказкі. У іх адлюстроўваюцца не толькі гісторыя, звычаі, быт, але і характар, душа народа. Чым больш чалавек ведае прыказак, тым больш народнага вопыту ён можа пераняць. Таму ў першым конкурсе «Моўная скарбонка» вучні шукалі правільны працяг прыказак.
У другім этапе вучні ператварыліся ў сапраўдных перакладчыкаў. Кожны атрымаў па перфакарце і перакладаў словы на беларускую мову. Гэты конкурс даў магчымасць успомніць не толькі беларускія словы, але і іх правапіс.

Пасля невялікага адпачынку клас адправіўся «У друкарню». Месца, дзе даюць жыццё кнігам, часопісам, газетам. Кожная каманда ўявіла сябе друкарамі і «надрукавала» сваё беларускае слова.
Апошні конкурс «Мы — пісьменнікі» аказаў вялікае ўражанне на дзяцей. Вучні памарылі на тэму «Мы — будучыя пісьменнікі» і з атрыманага набору слоў напісалі невялікае апавяданне. Напрыканцы мерапрыемства дзеці намалявалі падабайку.

Мы ўпэўнены, што вучні змаглі далучыцца да скарбніцы беларускай мовы і лепш зразумець яе прыгажосць і мілагучнасць.

Анастасія Алегаўна Тарасава,
настаўнік пачатковых класаў